የፐብሊክ ሰርቪስና ሰው ሀብት ልማት ቢሮ የግማሽ ዓመት የሥራ አፈጻጸሙን ገመገመ

የአዲስ አበባ ከተማ አስተዳደር ፐብሊክ ሰርቪስና ሰው ሀብት ልማት ቢሮ የ2018 በጀት ዓመት የመጀመሪያ ስድስት ወራት የዕቅድ አፈጻጸም አጠቃላይ የማናጅመንት አባላት በተገኙበት መድረክ ግምገማ አካሄደ።

​በምክትል ከንቲባ ማዕረግ የቢሮው ኃላፊ ክቡር ዶ/ር ጀማሉ ጀንበር በመድረኩ ላይ እንደገለጹት፤ የግምገማ መድረኩ አስፈላጊነት ባለፉት ስድስት ወራት የተከናወኑ ተግባራትን በዝርዝር በመፈተሽ፣ ጠንካራ ጎኖችን ለማስቀጠልና የታዩ ክፍተቶችን ደግሞ በጋራ ለመቅረፍ መሆኑን ተናግረዋል። አፈጻጸሙን መገምገም ተቋማዊ አቅምን ለማደበርና በቀሪው ጊዜ የተሻለ ውጤት ለማስመዝገብ መሠረት እንደሚሆንም ኃላፊው ገልጸዋል።

​በመድረኩ የቢሮው የዕቅድና በጀት ዳይሬክተር አቶ ታደሰ ደፋር፤ በስድስት ወራቱ በቢሮው ሥር ባሉ የተለያዩ የሥራ ዘርፎች የተከናወኑ ቁልፍና አበይት ተግባራትን የተመለከተ ሪፖርት አቅርበዋል።

ሪፖርቱን ተከትሎም ከተሳታፊዎች ሰፊ አስተያየቶችና ግብዓቶች የተነሱ ሲሆን፣ የቀረበው የሥራ አፈጻጸም ይበልጥ በሚዳብርበት ሁኔታ ላይ ውይይት ተደርጓል።

​ክቡር ዶ/ር ጀማሉ ጀንበርና የቢሮው የሥራ አመራሮች ከቢሮው ተሳታፊዎች ለተነሱ ጥያቄዎችና አስተያየቶች ማብራሪያ የሰጡ ሲሆን፤ በሪፖርቱ ላይ መካተትና መስተካከል የሚገባቸው ጉዳዮች ላይ አፅንኦት ሰጥተዋል።

​በዚህ የግምገማ መድረክ ላይ የቢሮው ከፍተኛ አመራሮች፣ የየዘርፉ ኃላፊዎችና አጠቃላይ የማናጅመንት አባላት ተገኝተዋል። በመጨረሻም በቀሪው የበጀት ዓመት ጊዜ ውስጥ የታቀዱ ተግባራትን በላቀ ጥራትና ፍጥነት ለማከናወን የሚያስችል የጋራ መግባባት ላይ ተደርሷል።